Gitanyag ug mapalit na ang puro nga organikong produktong agrikultura pag abli sa publiko sa Organic Agriculture Trading Post nga nahimutang atbang sa Jeepney Terminal Taboan Market Barangay Fort Poyohon sakop sa syudad sa Butuan. Mipaabot sa dakung pasalamat si City Councilor Cherry May Busa sa tanang organic farmers sa sakripisyo ug padayong pagkugi aron dunay makaon ang tanan nga healthy ug masustansya. Mipasalig sab kini sa dakung suporta sa tanan ilabina sa panguma. Gani, usa siya sa mitabang uban ni Vice Mayor Lawrence Fortun nga mapadali ang pagpasa sa mga ordinansa ug resolusyon nga giduso alang sa malahutayong programa ug suporta sa mga mag-uuma sa syudad sa Butuan. Gitimbaya sab ni City Councilor Eduardo Gonzalez ang tanan nga nagpaluyo sa programa sa pagpromote sa inobasyon pinaagi sa pagbaligya og organic products. Nanghinaut ang opisyal nga magmalahutayon ang programa aron permanente na nga dunay lugar asa mapalit ang organikong produkto sa ubos nga presyo. Dugang pa niini, consistency ang usa sa yawe sa kalampusan sa programa. Pasabot nga kung unsay demand nga organic product anaa kanunay dinhi. Subay sa aktibidad mipasalig sab ang konsehal nga tabangan ang barangay ug kooperatibang masulbad ang problema sa basura sa dapit. Sa pag-abli niini kaganinang buntag, nagtinabangay ang lokal nga panggamhanan sa Butuan pinaagi sa City Agricultures Office sa hugot nga suporta ni Mayor Ronnie Vicente Lagnada, Department of Agriculture-Organic Agriculture Program ug Butuan City Organic Agriculture Cooperative.