Malampusong napahigayon ang Public Auction sa mga delinquent real properties o mga kabtangan nga wala na giatiman sa mga tag-iya pinaagi sa pagbayad sa buhis. Hatagan og isa ka tuig nga lugway ang mga tag-iya nga matubos ang ilang kabtangan human sa natigayong public auction apan apil niining bayaran ang dos porsyento nga tubo sa kwarta sa bidder matag bulan gikan sa pag subasta. Human sa usa ka tuig nga wala nay pagpakabana ang mga tag-iya sa mga kabtangan nga naapil sa subasta mamahimo nang iproseso sa bidder ang mga dokumento aron pormal na kining mapanag-iyahan ang kabtangan. Samtang ang mga kabtangan nga walay bidder mabalik kini sa gobyerno. Kung lima ka tuig nga dili mabayran ang buhis sa mga real properties sama sa agricultural land area, residential land area, commercial land area, road lot ug industrial land area ug residential o commercial buildings bisan sa gihimong impormasyon ug pagpadala sa mga sulat o notice ngadto sa mga tag-iya mamahimo na kining maapil sa public auction. Gipahinumduman ang tanan nga atimanon ug bayaran ang buhis sa mga propriedad tungod mao kini gamiton alang sa lain-laing programa ug proyekto nga gipatuman sa lokal nga panggamhanan sa Butuan sa kadumalahan ni Mayor Ronnie Vicente Lagnada ilabina ang pagpalambo sa imprastraktura sama sa pagpangsemento sa mga dalan, urban drainage, mga gambalay, tulay ug uban pa. Nakatakda ang sunod nga public auction sa umaabot Disyembre ning tuig. Ang gihimung Public Auction gipangunahan sa City Treasurers Office uban sa suporta sa pipila ka buhatan sa city government sa Butuan.