Nakabaton sa taas nga satisfaction rating ang Police Regional Office 13 sa gipahigayong survey sa client’s satisfaction sa serbisyo nga gitanyag sa mga kapulisan ngadto na sa mga residente sa rehiyon sa Caraga labina dinhi sa Butuan City. Base sa gihimung pagtuon sa Mindanao Development Authority nga 2022 Trust, Respect and Safety Study, nasayran nga nakakuha og taas nga trust rating, taas ang respetong gipakita sa mga residente ngadto sa mga pulis tungod nakabati ang mga residente nga sila luwas kanunay. Gipresenta sa MinDA nga nakakuha ang PRO 13 Caraga og 91% sa Trust; 90% sa Respect: ug 88% sa Safety. Ang pagtuon gipahigayon gikan Disyembre 15 hangtud 27 miaging tuig nga adunay 1,200 nga mga respondents. Ang survey nagtan-aw sa seguridad sa lugar, ang proteksyon nga gibati sa mga tawo, ug sa satisfaction nga nabati sa mga residente ngadto na sa mga kapulisan sa hisgutanan sa paghatag og serbisyo. Misaad ang Lokal nga Panggamhanan sa pagpanguna ni Butuan City Mayor Ronnie Vicente Lagnada pinaagi sa Butuan City Police Office nga syento porsyento nga makigkooperar sa PRO-13 aron mas mapakusgan ang paghatag og seguridad ug proteksyon sa katawhan. Gipresenta sa MinDA ang resulta sa pagtuon niadtong Biyernes atubangan sa mga opisyal sa Police Regional Office 13 sa Barangay Libertad ning syudad. Gikalipay sa PRO13 ang resulta sa pagtuon ug misaan nga gamiton kining basehan aron mas mapalig-on pa ang ilang serbisyo labi na sa mga probinsya nga ubos gamay ang rating. Ang Satisfaction Survey nagsilbing siyentipikong pamaagi aron matino ang Performance sa Philippine National Police sa pagpatuman sa balaod ug relasyon niini sa komunidad. Gawas sa Butuan City, unang gihimo ang survey sa Davao Region ug gitakdang ipatuman sa ubang bahin sa Mindanao.