Nahimung malampuson ang natigayong unang Regular Sangguniang Panlungsod Session sa bag-ong tuig sa pagpanguna ni Butuan City Vice Mayor Lawrence Fortun. Sa session usa- usa nga gipresentar sa mga miyembro sa SP ang nagkadaiyang proposed resolusyon ug ordinansa alang sa referral ug diskusyon sa komitiba. Kini naglangkub sa mga resolusyon sa supplemental budget sa pipila ka barangay sa syudad sa Butuan, resolusyon sa pagtugot kang Mayor Ronnie Vicente Lagnada pinaagi sa city government sa Butuan sa pagpirma sa kasabutan sa deed of usufruct tali na sa PhilHealth Regional Office Caraga nga magtukod sa gambalay sa may Barangay Baan Km3 ning syudad sa Butuan, resolusyon sa pagtugot usab kang Mayor RCL pinaagi sa City government sa Butuan sa pagpirma sa Memorandum of Agreement tali na sa Father Saturnino Urios University Foundation Inc., Anticala Tribal Council Elders ug Leaders Association Inc. ATRICELAI alang sa Sustainable Social Entrepreneurship sa mga Indigenous People Program sulod sa Certificate of Ancestral Domain Title CADT 135. Atol sab sa session gipresentar ang Traffic Management Plan sa ipahigayong National Rally for Peace sa Iglesia ni Cristo karong Enero 13, adlawng Lunes sa Sport Complex Barangay Libertad, ning syudad. Gipaniguro sa tibook pwersa sa SP nga mahatagan sa katin-awan ug tukmang diskusyon ang tanang giduso nga mga resolusyon ug ordinansa aron masiguro ang hapsay nga pagpatuman niini alang sa kaayuhan sa syudad sa Butuan.