Gilusad ang Project Summer Reading Enhancement Camp kun Project SuRE Camp didto sa Butuan Central Elementary School Covered Court kaganinang buntag. Ang Project SuRE Camp usa ka inisyatibo sa Lokal nga Panggamhanan sa Butuan pinaagi sa City Education, Literacy and Scholarship Office kun CELSO kauban ang Department of Education Butuan City aron ma tutukan ug mahatagan og panahon nga matudluan ang mga bata nga dili kantigo mobasa. Anaa sa 375 ka mga bata ang makabenipisyo sa programa nga gi-identify pinaagi sa usa ka tool asa nakita nga dili kaantigo mo istorya sa alpabeto o bisan paman sa sound niini. Sa mensahe ni Konsehal Eduardo Gonzalez gipaabot niya sa mga partisipante ang kaanindot sa proyekto tungod ang pagbasa ang usa sa basic nga kinahanglang masayran sa bata para molampos. Nagpasalamat sab siya sa lakang nga gibuhat sa mga magtutudlo aron matabangan ang mga dili kaantigo mobasa. Gihingusgan ni Schools Division Superintendent Dr. Minerva Albis nga magtinabangay ang tanan sa paghatag og suporta para sa bata nga gilangkuban sa LGU-Butuan, DepEd ug mga ginikanan. Gi-awhag sab niya ang mga ginikanan nga maggahin og oras nga tudloan ang mga bata sa pagbasa. Anaa sa paglusad si OIC CELSO Head Rosalito Libres, mga magtutudlo, mga ginikanan ug ang mga bata. Mag sugod ang kick-off sa Project SuRE Camp sa eskwelahan karong Lunes, Agosto 7 ug mahuman pagka Agosto 11,Biyernes.