Gihisgutan ug gidiskusyunan sa komitiba ni City Councilor Cherry May Busa, Committee Chair sa Science and Technology ang programang Earthquake Probalistic Risk Assessment sa DOST-Phivocs uban sa kaubanan sa konseho ug ang mga personahe sa nasangpit nga ahensya, miaging semana. Apil sab nahisgutan ang ipahigayong pinirmahay sa Memorandum of Agreement kun MOA tali na sa City Government sa Butuan pinaagi ni Mayor Ronnie Vicente Lagnada ug ang DOST-Phivocs. Atol usab sa maong pagdungog gipahibalo sa Phivolcs nga mopahigayon kini og mga pagtuon sulod sa Butuan City gamit ang software platform asa mamahimong gamiton sa pagtuon ang mga istrukturang panimalay ug business establishments aron mas sayon ang pag analisar sa mga posibleng damyos kabahin sa inprastraktura tungod sa posibleng mga linog. Gisaysay usab sa ahensya nga kung unsa mang resulta sa mga pagtuon mao ang gamiton o basihan sa pagpangandam sa lokal nga panggamhanan sa Butuan kung dunay muabot nga linog. Positibo si Konsehal Busa nga makatabang sa syudad ang programa alang sa kaayuhan sa kinatibuk-an.