Gisusi sa City Trade Industry and Investment Promotion Office kun CTIIPO mga establisamento sa syudad miaging semana. Kini gilangkuban sa Taboan Public Market, Salvador Calo Public Market, Pure Gold Langihan, Wing On Grocery, Inc., SM City Butuan Supermarket ug Robinsons Supermarket. Gibuhat ang aktibidad para susihon ang presyo, timbangan, permits, kalimpyo sa lugar ug kalidad sa ilang mga gipamaligya aron luwas ang mga mamalitay sa posible nga pampanglimbong tungod sa presyo o kaha timbangan. Lakip na nga masiguro nga ang mga pwesto sa mga mamaligyaay limpyo, dunay health cards ug dili lata ang mga gipamaligya. Pipila sa mga mamaligyaay nakitaan og violation sa timbangan tungod sa wala pag calibrate niini, gibutang lang ang gulay ug prutas sa salog, ug uban pa. Sumala ni Maria Kristina Cassion, Head sa CTIIPO nga ang Bantay Presyo, Produkto, ug Establisamento usa ka mandato nga angayan sundon para proteksyonan ang mga mamalitay ug ang mga mamaligyaay. Gipangunahan ang aktibidad sa CTTIPO kauban ang City Business Permits and Licensing Office, City Health Office, City Agriculture Office, City Treasurer Office, City Veterinary Office, Office of the City Economic and Entreprise, ug Civil Security Division.