Malampusong napahigayon ang duha ka adlaw nga Capability Training sa mga Campus Journalist sa piling eskwelahan sa syudad, sa may Almont Inland Hotel, ning syudad. Ang kalihukan gisalmutan sa pito ka eskwelahan nga gilangkuban sa Butuan City School of Arts and Trades, Libertad National High School, Timber City Academy, San Vicente National High School, Agusan National High School, Taligaman National High School, ug Butuan City Senior High School - Stand Alone. Gipaabot ngadto sa mga estudyante ug coaches ang News Writing & Reporting Workshop nga gi share ni Charmane Awitan ug Photojournalism Workshop nga gi discuss nila Bryan Yu ug Royce Serrano. Gihisgutan ang prinsipyo sa pagbuhat og balita ug ang pag capture sa pictures gamit lamang ang cellphone ug DSLR Camera. Gi lecture sa mga misalmot ang news values, structure, headlines, ug ethics. Human niini, gihatagan og kahigayunan ang mga partisipante sa pagbuhat og ilang kaugalingong news article nga gisundan dayon sa Review and Feedback. Samtang, sa ikaduhang adlaw, mipailawom sab sa lecture sa Fact-Checking ang mga partisipante nga gihatag ni PIA Caraga Assistant Regional Director Renelle Escuadro. Gisundan kini og group discussion kabahin sa papel sa journalism sa pagbatok sa misinformation. Gihisgutan sab ang Media Ethics and Responsible Journalism nga gihatag sa Butuan-Agusan del Norte KBP President Glen Bequibel, ang topic gilangkuban sa ethics, privacy, ug responsible reporting. Gipangunahan sa City Executive Management Department - Public Information Division ang nasangpit nga kalihukan sa tinguhang mapalig-on ang kahanas ug kahibalo sa mga estudyante sa larangan sa journalism.