Nakadawat og Certificate of Affiliation gikan sa National Library of the Philippines ang pito ka mga punong barangay sa syudad sa Butuan human sila naka comply sa mga nag-unang rekisitos aron makabaton og barangay reading centers sa ilang barangay. Ang Certificate of Affiliation gitunol nila Konsehal Reynante Desiata, City Administrator Atty. Joseph Ian Sabado, ug Jessica Clarito, Head sa City Library. Ang mga nakadawat og certificate of affiliation gilangkuban sa Barangay Dankias, Barangay Mandamo, Barangay Don Francisco, Barangay Pigdaulan, Barangay Rajah Soliman, Barangay San Mateo, ug Barangay Basag. Ipadala sa Manila ang mga Punong Barangay ug Baranga Secretary sa nasangpit nga barangay aron ipailawom sa pagbansay kung paunsa padaganon ang reading center. Human sa training, madawat nila ang benepisyo nga brand new books nga nagkantidad og 500,000.00 pesos, usa ka desktop computer, yearly nga supply sa libro, training sa focal person sa barangay reading center, ug kung ugaling nindot ang ilang pagpamalakad sa center dunay tyansa nga makadawat og award ug special programs. Gikalipay sa Lokal nga Panggamhanan sa Butuan ang gibuhat nga inisyatibo sa mga barangay officials aron makabaton og reading centers. Ang pasilidad dako og tabang sa mga residente para dali nalang ang pagtuon ug makahimu og research tungod anaa na kini mismo sa ilang barangay.