Malampusong natigayon sa mga National Validators ang field ug documents evaluation sa mga Butuanon Finalist sa 50th Gawad SAKA Parangal sa mga Natatanging Magsasaka at Mangingisda. Unang nagcourtesy visit ang tulo ka team sa national validators sa City Agriculture and Veterinary Department sa LGU Butuan asa giabi-abi ni CAVD Head Engr. Pierre Anthony Joven. Gipahibalo ang importansya sa mga mag-uuma nga dunay dakung kita pinaagi sa pag adopt sa mga inobasyon ug musunod sa technical assistance aron mamahimong transformative ug champion ang sektor sa agrikultura sa dakbayan sa Butuan. Tulo ka kategorya ang gibasehan sa evaluation asa nakuhang finalist sa kategoryang Agri-Fisheries Enterprise ang Sumile- Taguibo Farmers’ Cooperative kun SUTAFACO nga dunay kapin gatus nga miyembro nga nagsupply og gulay sa mall, nagdumala sa usa sa Agrimart Flagship Store ug nagpahigayon og vegetable mobile store sa bisan asang komunidad sa nasud. Napili sab nga finalist sa kategoryang Small Water Irrigation System Association kun SWISA ang Baan Integrated Farmers Association Inc. kun BIFAI asa dunay dakung dam nga gikuhaan sa patubig alang sa ektarya-ektaryang kahomayan nga usa sab sa dunay dakong produksyon sa humay sa rehiyon. Samtang napili sab nga finalist sa kategoryang Oustanding Young Farmer o Fisherfolks ang Butuanon Young Farmer nga si Joel Vincent Cabanacan nga taga Barangay Dumalagan. Sa kabatan-on ni Cabanacan usa na kini ka supplier og lettuce, hito, salted eggs, atsara, saging ug uban pa. Gi-adopt niini ang hydroponics technology nga pagtanum sa lettuce sulod sa greenhouse facility, dunay igong facilities alang sa hito ug salted eggs produksyon. Garbo sa syudad sa Butuan nga nahimong finalist ang mga Butuanong mag-uuma. Masayran ang resulta ug awarding sa kompetisyon sunod bulan.