Naugdaw sa nahitabong sunog ang upat ka balay sa Barangay New Society Village ning syudad pasado ala una kaganinang hapon. Gi-respondehan sa Bureau of Fire Protection kauban ang City Disaster Risk Reduction and Management Office kun CDRRMO ug mga volunteer fire brigades ang nahitabong sunog sa Barangay New Society Village ning syudad. Base sa inisyal nga report sa Bureau of Fire Protection kun BFP nagsugod sa kusina sa usa ka balay ang sunog. Gama sa light materials ang mga balay nga naugdaw sa sunog. Sumala ni FO3 Ben Sergio Pelletero, Investigator sa Bureau of Fire Protection nga dunay report sa illegal tapping sa nasangpit nga lugar. Susihon pag usab sa BFP aron matino ang hinungdan sa sunog. Samtang, mibisita si Konsehal Ehrnest John Sanchez sa lugar ug nakighinabi sa mga residente labi na sa mga nabiktima. Kasamtangan karong misilong ang mga residenteng nasunogan sa covered court sa ilang Barangay.