Nagtagbo ang mga personahe sa Agusan del Norte Electric Cooperative ug SP Members sa gipahigayong Committee Hearing. Kini gumikan sa sunod-sunod nga pagkapalong sa kuryente sa bisan asang bahin sa syudad sa Butuan nga nakapa-alarma ug nakaapekto na sa mga konsumador ug stakeholders. Gipangunahan ni City Councilor Rey Desiata, Committee Chairperson sa Urban Planning and Infrastructure uban sa kaubang konsehales sa dakbayan sa Butuan ang nasangpit nga committee hearing. Pinaagi niini, masayran sa mga opisyal ang rason sa pagkawala sa electric power sa halos tibook syudad matag adlaw. Gani usa si City Councilor John Gil Unay ang mipadayag sa iyang privilege speech atol sa 12th SP Regular Session miaging semana. Gitudlo sa ANECO ang technical issues, panahon, animal factor ug kahoy ang hinungdan sa pagkapalong sa kuryente. Apan giklaro sab sa ANECO nga walay undang ang pagtrabaho sa mga linemen ug gipaningkamutang maresolba gilayon ang problema sa power interruption.