Gikalipay sa mga residente sa Barangay Nongnong ning syudad ang daku nga kalambuan sa barangay dihang usa usang nangabot ang mga proyekto nga naglangkob sa farm-to-market road ug water system tungod nahatagan na og katumanan ang dugay na nilang pangandoy. Sumala ni City Councilor Rey Desiata importante ang kalambuan sa usa ka barangay ilabina ang nindot ug maayong karsada ug makabaton sa limpyong tubig aron molambo ang economic activity niini ug paspas na ang pagkanaug sa mga abot sa mag-uuma sa merkado. Mipaabot sab sa dakung pasalamat si Nongnong Punong Barangay Wilfredo Membrillos kang Mayor Ronnie Vicente Lagnada, Congressman Jose Aquino II, Vice Mayor Lawrence Fortun ug SP members nga maoy naningkamot nga mapunduhan ang mga proyekto nga nakaabot sa iyang barangay nga karon napahimuslan na sa tanan. “Suweto ko ani nga barangay kay diri ko natawo grabe gyod kapait sa una imagine gikan mi diri alas tres sa kadlawon magpas-an mig saging abot mi sa Bit-os alas siete sa buntag. Grabe kalisud sa dalan, dalan nga gamay nga malubong pa gyod ang karmata. Salamat sa atong gobyerno nga natubag na ang dugay namong pangandoy sa Barangay Nongnong.” pahayag ni PB Wilfredo Membrillos. Kini nga proyekto gipunduhan sa DILG ubos sa programang National Task Force-End Local Communist Armed Conflict kun NTF-ELCAC pinaagi sa Local Government Support Fund-Support Barangay Development Program kun LGSF-SBDP nga gipatuman sa City Engineers Office pinaagi usab sa plano ug direktiba ni Mayor Ronnie Vicente Lagnada. Nahimong posible ang pagpatuman sa mga proyekto gumikan sa composite team nga naglangkub sa PNP, Phil Army, DILG ug city government sa Butuan ug uban pang ahensya asa nikanaug sa barangay level aron masayran ang nag-unang panginahanglanon.