Gipangunahan ni City Councilor Ehrnest John Sanchez isip Committee Chairperson sa Civil Service and Reorganization ang Committee Hearing aron mapahigayon ang pagsusi ug pagrepaso sa gipresentar nga reorganizational plans sa mga buhatan sa lokal nga panggamhanan sa Butuan. Kini gilangkuban sa City Treasurers Department, City Human Resource Management Department, City Budget Office ug City Information and Communication Technology Department. Sa tumong nga klaro ug inklusibo nga diskusyon sa reorganizational plans, giimbitahan sa komitiba ang Civil Service Commission ug mismong mga personahe sa nasangpit nga buhatan aron mohatag sa komprehensibong depensa basi sa direksyon sa gipresentar nga reorganizational plans. Ang reorganization ug pagbag-o sa structure sa mga buhatan sa lokal nga panggamhanan sa Butuan usa sa direktiba ni Mayor Ronnie Vicente Lagnada aron makita ug mahatag ang klarong serbisyo ug performance sa mga empleyado o masunod ang gipatumang Strategic Performance Management System. Hinungdan kinahanglang mapresentar sa mga department heads ang strategic ug competitive plans alang sa epektibo ug epesyenteng serbisyo sa syudad sa Butuan. Ang committee hearing sa civil service ug reorganization suportado nila City Councilor Cherry May Busa, Eduardo Gonzalez ug Arturo Gado.