Striktong gipahugtan sa Butuan City Project Monitoring Committee kun BCPMC ang pagsusi sa nagkadaiyang mga proyekto sa syudad base sa natigayong 2nd Quarter Meeting sa fiscal year 2025 miaging semana sa City Mayors Conference Room 2, City Hall Building. Ang meeting gipangunahan mismo ni BCPMC Chairperson OIC City DILG Director Annabel Yangson. Dinhi nahisgutan ang updates ug status sa proyektong napailawom na sa inspeksyon subay sa agenda sa 1st Quarter 2025 Field Monitoring. Gihisgutan sab ang mahitungod sa mga gipatumang water system projects sa rural barangay, on-going improvement sa Butuan Medical Center apil ang Sewerage Treatment Plant ug ang mekanismo sa gipatuman nga local infrastructure ug development projects. Ang paningkamot sa BCPMC nga gilangkuban sa lain-laing buhatan sa lokal nga panggamhanan sa Butuan, Regional Line Agencies, Barangay ug ubang key stakeholders nagpakita sa usa ka lig-on nga dedikasyon, transparent governance ug sustainable development alang kalidad nga serbisyo sa syudad sa Butuan.