Hugot nga gimanduan ni Butuan City Mayor Ronnie Vicente Lagnada ang mga barangay surveillance team nga molihok aron mapahugtan ang programa batok na sa iligal nga druga. Kini atol sa natigayong 3rd Quarter Joint Meeting sa City Peace and Order Council kon CPOC ug City Anti-Drug Abuse Council kon CADAC sa may Almont Inland Hotel ning syudad, miaging semana. Gipahayag ni Mayor Lagnada nga pahugtan ang programa sa mga barangay aron ma capacitate ang mga barangay ug mga residente niini sa pagbatok sa iligal nga druga. Gani, personal nga nakigkita si Mayor Lagnada sa mga Hepe sa mga ahensya aron mahisgutan ang pag batok sa iligal nga droga para masiguro nga mapadayon ang mga programa nga laban na sa droga. Lakip sab gisiguro sa konseho nga dunay igong silot kung makita nga nag protekta sa droga sa syudad. Aktibong mihatag og updates, reports, ug mga plano ang mga miyembro sa CPOC ug CADAC sa konseho. Gibuhat na ang CADAC Project Monitoring Committee tungod alarming na ang pagsaka sa kaso sa droga sa syudad. Hatagan sab og suporta ang tanang ahensya nga nag protekta sa kahapsay ug kalinaw sa syudad. Pinaagi sa aktibong partisipasyon ug kolaborasyon sa CPOC ug CADAC ug sa pagpatuman sa mga programa nga vital sa pagmintinar sa kalinaw ug seguridad sa syudad sa Butuan. Nanguna sa meeting si Mayor Ronnie Vicente Lagnada kauban sila City DILG Charissa Guerta, Konsehal Ehrnest John Sanchez, ug City Administrator Atty. Joseph Ian Sabado.