Gitinguha ni Mayor Ronnie Vicente Lagnada nga mapatuman sa Lokal nga Panggamhanan sa Butuan ang pagpalambo sa sistema, pag adopt sa teknolohiya ug labaw sa tanan ang pagpatuman sa good governance. Pinaagi niini, napahigayon ang Audit Committee Workshop kauban ang mga miyembro sa City Audit Committee ug SGV Consultants. Tumong niini nga mas madunggan ug masabtan sa mga miyembro sa komitiba sa audit ang mga tahas ug responsibilidad subay sa mandatos isip audit committee sa ingon mas makahatag usab ug mga komento ug rekomendasyon ang komitiba subay sa gipatumang best practices sa pagpadagan sa city government sa Butuan. Sa nasangpit nga audit committee workshop, nanguna sa hisgutanan ang governance nga naglangkob sa management oversight, transparency ug accountability. Apil sab nahisgutan ang mga areas nga gitutukan sa audit committee nga naglangkob sa values and ethics, risk management, internal control, internal audit activity ug monitoring sa management action plans, external audit ug public accountability reports. Gipangulohan ang audit committee ni Mayor Ronnie Vicente Lagnada, kauban ang ubang miyembro na sila Vice Mayor Lawrence Fortun ug mga konsehal sa syudad nga sila Cherry May Busa, Cromwell Nortega, Joseph Omar Andaya ug Ehrnest John Sanchez. Mapasalamaton sab si Mayor Lagnada sa padayong suporta sa SGV sa pagpanguna ni Joseph Ian Canlas isip partner sa pagpalambo sa sistema sa City Government sa Butuan pinaagi sa City Internal Audit Service Office (CIASO) nga gipangulohan ni Ms. March Belle Lor, CPA uban sa City Planning and Development Office (CPDO).