Nagkatapok ang pipila ka Department Heads, key personnel ug Internal Auditors sa lokal nga panggamhanan sa Butuan sa natigayong LGU-Wide Awareness Campaign sa Southville Hotel and Convention ning syudad, Setyembre 17. Kini alang sa pagpaila ug pagpasabot sa Framework sa Audit Rating System kun ARS ug ubang mga serbisyo sa City Internal Audit Services Department kun CIASD. Sa gipadalang mensahe ni Butuan City Mayor Ronnie Vicente Lagnada pinaagi kang Assistant Department Head sa City Executive Management Department Atty. Noel Ephraim Antigua, gipahayag niini nga ang framework ug internal control components sa Audit Rating System sa lokal nga panggamhanan sa Butuan magsubay sa upat ka Governance Safeguards. Kini gilangkuban sa Leadership, Organization, Partnerships ug Financial Health. Ang ARS isa ka programa alang sa padayong pagpalig-on sa organisasyon uyon sa ikaduhang Governance Safeguard. Ang pagpatuman sa Audit Rating System sa lokal nga panggamhanan sa Butuan nagsubay sa lima ka internal control components o criteria nga naglangkub sa Control Environment, Risk Assessment, Control Activities, Information and Communication ug Monitoring Activities. Gihingusgan ni Mayor Lagnada ang pagpatuman sa Internal Audit pinaagi sa Audit Rating System aron makasiguro nga makasubay ang mga nagkalain-lain nga departamento sa regulatory requirements ug standard, ma-account ang public funds ug resources sa Butuan, mapatuman ang public accountability sa matag opisyales ug empleyado sa maong buhatan, ug labi pang mapalambo ang kalidad sa panerbisyo sa tanang katawhan. Gihanyag sab sa nasangpit nga kalihukan ang mga bag-ong serbisyo ni CIASD kauban niini ang Consulting Services nga ma-request sa mga nagkadaiyang opisina ug Special Audit Engagements pinaagi sa direktiba sa City Audit Committee. Ang kalihukan gipasiugdahan sa mga Internal Auditors sa CIASD sa pagpanguna ni March Belle F. Lor, CIASD Acting Department Head.