Nahimong produktibo ang natigayong 4th Liga Meeting miaging semana sa pagpanguna ni Liga President Gemma Tabada. Nanguna sa hisgutanan ang pag aprobar sa resolusyon alang sa pagpangandam sa paggamit sa Liga Composting Facility asa nahimutang sa Barangay Aupagan ning syudad ug ang pag assign sa mamahimong operator ug magdumala sa pasilidad. Bisita sab sa tigum ang mga personahe sa City Accounting Department, City Anti-drug Abuse Council kun CADAC ug uban pang buhatan sa lokal nga panggamhanan sa Butuan aron ipaabot sa mga punong barangay ang mga kinahanglang isumiteng report kalabot sa gipahigayong aktibidad sa matag barangay. Ang liga meeting usa sa binulan nga kalihukan sa mga punong barangay aron personal mapaabot kang Liga President Tabada ang mga nagkadaiyang issues ug concerns sa mga barangay nga nagkinahanglan og suporta. Atol sab sa tigum gi-aprobahan ang mga gidusong resolusyon sa liga ng mga barangay subay sa nagkadaiyang kalihukan ug programa sa kabarangayan aron mahatag ang kalidad nga serbisyo sa katawhan uban sa hugot nga suporta ni Mayor Ronnie Vicente Lagnada.