Nagmalampuson ang panagtagbo sa mga negosyante ug stakeholders sa natigayong 26th Caraga Business Conference sa Hotel Oazis Butuan City miaging semana. Kini sa pagpanguna sa Butuan City Chamber of Commerce and Industry Foundation Inc. pinaagi ni President Cristina Hemady Romarate Arcillas. Kini nga panagtagbo paagi aron magkahiusa sa pagmugna og plataporma alang sa mga negosyante ug sayron ang mga innovative ideas ug industry experts pinaagi sa pagpakita sa mga produkto ug serbisyo sa pagpalambo sa business community ug pagpadako sa oportunidad. Suportado kini sa lokal nga panggamhanan sa Butuan pinaagi ni Mayor Ronnie Vicente Lagnada nga gi-representahan ni Butuan City Vice Mayor Lawrence Fortun. Sa welcome message ni Vice Mayor Fortun nagpasalamat kini sa tanang delegado ug nagkanayon nga ang kalampusan sa conference nagdepende sa kolaborasyon sa komunidad, sa mga negosyante pinaagi sa panagtapok sa resources ug expertise. Nanghinaut sab kini nga ang Caraga region molambo uban sa hiniusang pag engganyo og investors nga mobubo og negosyo sa ingon makamugna og daghang oprtunidad asa makabenipisyo ang tibook rehiyon. Atol sa conference, gipakita ni City Business Permits and Licensing Department Head Atty. Moshi Ariel Cahoy ang usa sa best practices nga gipatuman sa buhatan sama sa City Government of Butuan Ease of Doing Business Journey. Kini aron ma-adopt kini sa mga partisipante ang paspas ug digitalized nga proseso sa pagkuha og business permits sa mga negosyante sa dakbayan sa Butuan. Samtang gihisgutan sab dinhi ni ARTA Director General Secretary Ernesto Perez ang Ease of Doing Business in the Philippines ug ang Anti Red Tape Act. nga matud pa niini sugod sa pagpatuman sa maong programa ug balaod midaghan na ang negosyante ug midagsa na ang investors sa nasud. Dugang pa niini ang Butuan City anaa na nahimutang sa ika 49th nga syudad sa tibook nasud nga fully compliant eBOSS sa nasud. Gipasayud sab dinhi ni Atty. Michelle Dela Calzada, Chief Economic Development Specialist of the Policy Formulation and Planning Division NEDA Caraga ang Caraga Regional Development Plan tuig 2023-2028. Dinhi nahitala nga ang Butuan City and dunay fastest growth among local economies sugod tuig 2022 nga miabot sa 9.5% kini base sa Economic Situationer Provincial Product Accounts. Atol sab sa aktibidad gipahigayon ang pinirmahay sa ARTA memorandum of agreement ug nahatagan sa kahigayunan ang mga MSMEs sa rehiyon Caraga nga ibida ug ibaligya ang tagsa-tagsang produkto nga nakadisplay gawas sa venue.