Malampusong napahigayon ang tulo ka adlaw nga Butuan City Development Council kun BCDC Sectoral Working Committee meeting sa pagpanguna sa City Planning and Development Office miaging semana. Kini aron direktang masayran ni Mayor Ronnie Vicente Lagnada ang gimbuhaton sa matag sektor nga kusganong gitutukan ni Mayor Ronnie Vicente Lagnada. Dunay lima ka sectoral working committee nga gilangkuban sa institutional development committee, economic development committee, social development committee, infrastructure development committee ug environment development committee. Kinahanglang mopili og chairperson ug co-chair aron manguna sa pagmugna og plano, programa ug proyekto pinaagi usab sa tabang nga rekomendasyon sa mga miyembro. “Mao ni ang unang meeting para sa sectoral organizational alang sa members sa Butuan City Development Council nato. Tumong niini dunay series of committee meeting. First agenda mag elect og chairperson ug co-chairperson ug dunay workshop para mavalidate nato ang mga issues ug mga challenges sa mga Butuanon. Aron masayran nato kung naa pay mga emerging issues nga wala pa nato na address.” pahayag ni Engr. Iris Joy Montero Caňete -Galaura. Napili sa Economic Sector nga Chairperson si Engr. Pierre Anthony Joven ug Co-Chairperson si Christina Hemady Arcillas sa Butuan City Chamber of Commerce and Industry Foundation Inc., sa Environment Sector si For. Alexander Alaan ug Co-Chairperson si Datu Robinson Dapiniagan, sa Social Sector Chairperson si Golda Pocon ug Co-Chairperson si Pastor Recto Labrador, Institutional Chairperson Victor Emmanuel Ozarraga ug Co- Chair PB Venusto Clarito samtang sa Infrastructure napiling Chairperson si Gemma Tabada ug Co-Chair si Engr. Zaldy Deronia. “Sa economic support nakita namo nga dapat tagaan og dakong pagtagad ug masulbad sa atong City Government sa Butuan ang solid waste management kay medyo wala pa kaayo naplastar. Naa may uban barangay nga plastar na so dapat ang 86 barangay maplastar na mao ning una namong gi-identify kay kung muingon tag roads naa naman on-going man. Then sa social support nakita namo kaning atong socialize housing naa namay plano ato nalang hulaton nga marealize sure man ta nga marealize kay daghan kaayo makabenefit ana, sunod atong public administration support akong nakita ang atong street lighting nga kinahanglan ma enhance ma improve gamit ang bag-ong technology.”ang pahayag ni PB Gemma Tabada. Ang maong panagtigum aktibong gisalmutan sa mga Department Heads sa City Government sa Butuan, Punong Barangays ug CSOs asa dunay dakong kontribusyon ug kalambigitan sa mamahimong plano sa matag committee. Pinaagi niini nga lakang lauman nga daling matubag ang tanang issues ug mga hagit sa tanang sektor tungod mas dali nang madungog ug makaabot ang impormasyon pinaagi sa napiling chairperson ug co-chair.