Malampusong natigayon ang lima ka adlaw nga 1st Quarter Butuan City Development Council Sectoral Working Committee Meeting sa pagpanguna sa City Planning and Development Department uban sa mga chairperson ug vice chairperson matag sektor sa Prince Hotel Barangay Imadejas ning syudad, miaging semana. Sentro sa meeting ang pag-update ug pagmugna og Comprehensive Development Plan sa tuig 2026 hangtud 2031 nga nagtuyok ug panagtagbo sa lima ka development sector nga gilangkuban sa Institutional Development Sector, Environment Development Sector, Economic Development Sector, Infrastructure Development Sector ug Social Development Sector alang sa daghang proyekto ug kalambuan sa syudad. Nahimu kining malampuson tungod sa mga ideya gikan sa mga partners nga 86 Punong Barangay sa syudad sa Butuan, Civil Society Organizations Leaders, personnel ug Department Heads sa lokal nga panggamhanan sa Butuan ug DOST Caraga. Direktiba ni Mayor Ronnie Vicente Lagnada nga ma-incorporate ang Comprehensive Development Plan sa smart-city plan pinaagi sa smart economy, smart living, smart mobility, smart environment ug smart people. Samtang sumala sa Department of Science and Technology DOST Caraga kinahanglan ang mamugnang lokal nga plano o Comprehensive Development Plan mo-integrate sa science and technology hinungdan anaa kini sa tibook aktibidad aron motabang ug mogiya sa mga partisipante. Sumala ni Chairperson Economic Development Sector Engr. Pierre Anthony Joven nga kinahanglan ang kooperasyon sa tanang partners ilabina sa barangay ug civil society organizations tungod dinhi magsugod ang data nga kolektahon sa council alang sa CDP sa tuig 2026-2031. Gipaningkamutan sab ni Infrastructure Development Sector Chairperson Gemma Tabada nga makamugna og mga programa nga haum sa kasamtangang panginahanglan sa katawhan ug pinasubay sa smart city plan sa syudad. Ang nakolektang data ug ideya nakatakdang ipresentar sa Full Council Meeting uban ni Mayor Ronnie Vicente Lagnada aron aprobahan kini sa tibook council ug partners.