Gihisgutan sa Komitiba sa Urban Planning and Infrastructure sa pagpanguna ni Konsehal Reynante Desiata ang pagdumala sa trapiko ug overloading sa duha ka tulay ning syudad. Kini human sa nahitabong aksidente sa Macapagal Bridge miaging semana asa nakita ang mga kakulangon ug angayang pangandaman pag abot sa emerhensiya apil niini ang sobra ka traffic sa Magsaysay Bridge panahon sa rush hour. Nakigtigum si Konsehal Desiata aron madungog ang mga rekomendasyon ug suhestyon sa mga regional agencies nga naglangkub sa DPWH, BCWD uban sa City Planning and Development Coordinator Office, City Engineers Office ug LTTMO aron mapangitaan og kasulbaran ang nasangpit nga problema. Admitado ang lokal nga panggamhanan sa Butuan nga overdue na ang lifespan sa Magsaysay Bridge ug dili garantisado ang retrofitting nga makapalig-on niini. Gikinahanglan usab ang dakung pondo alang sa full rehabilitation sa tulay ug mga pagtuon apan samtang wala pa kini nahitabo misugyot ang DPWH nga likayan gayod ang pag agi sa dagkong truck tungod gikonsidera usab sa ahensya ang dagkong tubo sa BCWD nga anaa sa tulay. Gikompirma usab sa DPWH nga luwas pa agihan ang Magsaysay bridge apan limitahan ang klase sa sakyanan nga muagi dinhi. Admitado usab ang operator sa weighbridge nga dili na nila mamonitor ang tanang loaded trucks tungod sa mga diversion roads sa syudad sa Butuan nga pwedeng maagihan hinungdan gikinahanglan sa komitiba ang koordinasyon sa LTO ug HPG aron dili maabusaran ang Macapagal Bridge ug malikayan usab ang pag agi sa dagkong truck sa Magsaysay Bridge panahon sa kagabhion. Gisugyot usab sa City Planning sa DPWH nga kung ipatuman na ang dugang tulay sa syudad siguraduhong 4 lanes na tungod usa kini sa direktiba ni Mayor Ronnie Vicente C. Lagnada isip long term solusyon sa trapiko. Nagpasalamat si Konsehal Desiata sa pagsanong sa mga bisita sa panagtigum asa suportado usab ni Mayor Lagnada ug mga kauban sa konseho nga sila Vincent Rizal Rosario, Ehrnest John Sanchez ug Cherry May Busa. Naglaum si Konsehal Desiata nga makab-ot sa syudad sa Butuan ang hapsay nga kadalanan ug luwas sa unsa mang aksidente pinaagi sa pagtinabangay sa tanan. Nakatakda ang laing panagtigum ug ipatawag ang atensyon sa ubang ahensya nga makatabang sa pagsulbad sa problema subay sa mga natigom nga suhestyon ug plano.