Gitinguha karon sa lokal nga panggamhanan sa Butuan ang pagmugna sa pinaka unang Smart-Eco GAD Code sa syudad aron mahatag ang serbisyo nga naglantaw sa katungod sa kalalakihan, kababayen-an ug kabataan apil ang mga sektor sa PWD, senior citizen ug ubang grupo. Kining Smart Eco GAD Code nagtutok na sa mga developmental areas lakip ang full digitalization aron masiguro ang serbisyo taliwala sa emerhensya. Gani usa ka Writeshop ug Validation Activity inubanan sa usa ka learning session aron makab-ot ang Gender Responsive Inclusive Digital Resilience and Safe city ang gipahigayon sa pagpanguna sa opisina ni Konsehal Cherry May Busa, Chairman sa Committee on Family, Women, and Children’s Welfare katambayayong ang USAID Beacon. Gisalmutan kini sa mga nagkadaiyang ahensya ug opisina sa LGU-Butuan apil ang mga identified national line agencies asa gi diskusyonan ang mga lakang ug mga angay ibutang sa Butuan Smart Eco City GAD Code. Ang bag-ong GAD Code nga mamugna mas mofocus sa gender equality ug social inclusivity aron ma cater ang tanang residente sa syudad sa Butuan. Ang mugnaong bag-ong GAD Code gipaniguro ni City Mayor Ronnie Vicente Lagnada kauban ang opisina sa Konsehal Cherry May Busa nga hatagaan og importansya ang tanang sektor sa syudad. Kini usab ang pinaka unang gender development code nga adunay elemento sa digital resiliency, inclusive, ug luwas para sa tanan.