Gipangunahan ni University of the Philippines President Atty. Angelo Jimenez ang pagbisita sa Mahayahay Elementary School sa Barangay Anticala ning syudad kaganinang buntag. Dala sa taga UP ang Kontemporaryong Gamelan Pilipino kun Kontra-Gapi Immersion nga programa para sa mga Indigenous People kun IP. "This is 40 years na nga organization sa UP that promotes Indigenous Music and Indigenous Culture as well. As the National University of the Philippines pinopromote talaga natin ang local culture,” pahayag ni UP President Atty. Angelo Azura Jiminez kalabot sa Kontra-Gapi Immersion. Gilangkuban ang programa sa managlahing aktibidad sama sa pagpakita og nagkalain-lain nga mga kanta, sayaw, ug instrumento sa mga IP. Mapasalamaton si Bai Lingganay Helen Guinsod Pojaras tungod nabisitahan sila sa taga UP lakip nga gidala ang Kontra-Gapi Immersion sa Mahayahay Elementary School. Daku kini og tabang kanila isip Manobo nga mailhan ang ilang identity sa katilingban. Nahatagan sab og higayon ang mga bata sa eskwelahan lakip na ang mga magtutudlo nga makakat-on og sayaw lakip na sa instrumento pinaagi sa usa ka workshop nga gi-andam sa Kontra-Gapi Immersion. Gawas sa Butuan City gilauman pa nga bisitahon nila ang uban pang kasikbit nga syudad ug munisipyo.