Gipahugtan karon sa City Government sa Butuan pinaagi sa City Transportation and Traffic Management Department kun CTTMD ang Anti-Colorum Operation pinaagi sa pagpahigayon sa Oplan Madiyaw nga Pagbiyahe. Kini nga kalihukan kabahin sa kampanya nga nagtinguhang masiguro ang luwas ug organisadong sistema sa transportasyon sa dakbayan sa Butuan. Ang Oplan Madiyaw nga Pagbiyahe gilangkuban sa hugtanong pag-monitor ug striktong inspeksyon sa mga pampublikong behikulo nga nag operate nga walay saktong papeles o prangkisa/TOP sa tinguhang maprotektahan ang mga pasahero gikan sa mga dili rehistradong pampasaheroan sa ingon malikayan ang risgo. Kini nga operasyon mas gipakusgan pinaagi sa kolaborasyon sa CTTMD, kapulisan ug uban pang mga ahensya aron sundon ang lagda sa kalsada ug masiguro ang epektibo nga pagpahigayon sa kalihukan. Subay niini gipahinumduman ang tanang driver ug operators nga musunod sa traffic rules ug kumpletuhon ang dokumento sa sakyanan aron dili ma penalize.