Ipatuman na sa lokal nga panggamhanan sa Butuan pinaagi sa City Transportation and Traffic Management Department kun CTTMD ang “No Jaywalking” nga palisiya sugod Marso 24, adlawng Lunes sa kasamtangang tuig. Gipahinumduman sa CTTMD ang publiko nga mosunod sa palisiya aron malikayan ang penalties. Ang CTTMD nagpahigayon og usa ka bulan nga information drive aron masayran sa katawhan ang kamahinungdanon sa palisiya. Mag-isyu na og citation ticket ang mga traffic enforcers sa bisan kinsa nga makalapas sa palisiya sugod sa nasangpit nga petsa. Ang “No Jaywalking” nga palisiya kabahin sa Transportation ug Traffic Management Code ubos sa mandato sa Road Safety Measures. Gihangyo ang publiko nga gamiton sa pagtabok sa dalan ang mga pedestrian lanes ug overpass ug pagsunod sa traffic signals aron malikayan ang road crash ug mupatigbabaw ang disiplina sa kadalanan. Sa karon kamulo na ang pagpintal sa pipila ka mga designated pedestrian lanes aron masiguro nga hapsay ug luwas ang pagtabok sa tanan. Ang tibook pwersa sa LGU Butuan naglantaw sa hapsay nga komunidad ug disiplinado nga katawhan. Tungod niini, nanghinaut ang mga tigbabalaod nga masabtan sa publiko ang pagpatuman sa palisiya tungod naglantaw kini sa kaayuhan sa tanan. Busa aron walay mahimong penalty musunod sa balaod trapiko. Ang pagpataw sa penalty paagi aron magbaton og disiplina ang tanan samtang anaa sa nagkadaiyang kadalanan sa ingon mapanalipdan ang kinabuhi ug masiguro nga luwas ug dunay seguridad ang matag usa. Mga Multa alang sa Jaywalking mao ang musunod: P100.00 — Unang paglapas P500.00 — Ikaduhang paglapas P1,000.00 — Ikatulong paglapas