Malampusong napahigayon sa lokal nga panggamhanan pinaagi sa City Health Department kon CHD ug Butuan Medical Center kon BMC ang pagsaulog sa National Family Planning Month, miaging semana sa may BMC, Barangay Tiniwisan ning syudad. Gatusan ka mga kababayen-an ang nahatagan og serbisyo sa family planning. Lakip gitanyag ang Family Planning Counseling ug Family Planning Talks sa mga misalmot sa kalihokan. Gihatagan og igong gibug-aton ni Roselle Bongoyan, RN, MMPSM, isip resource speaker ang ka importante sa family planning hilabi na sa pagbuo og pamilya. "Ang matag pamilya, kinahanglan nga masayod gayud sa pagplano sa ilang pamilya kay ang magtiayon dili man magbuot ang atong gobyerno o family planning pila kabuok ang anakon. Ang importante insakto og agwat. Tulo hantod lima ka tuig ang agwat sa mga bata ug dapat ang mga bata matagaan og insaktong panginahanglanon, mapa edukar, insaktong pamatasan ug mapa dako og ayo" Sumala pa ni Roselle Bongoyan. Human sa seminar gipapili dayon ang mga partisipante sa ilang family planning nga buot gamiton. Gi-awhag atol sa kalihukan ang Intrauterine Device kon IUD, Progestin only Subdermal Implant, ug Contraceptive - Injectable. Usa si Chastine Moralde, 26 anyos nga taga Barangay Taguibo ang mipahimulos sa libreng serbisyo sa Family Planning. Sumala niya, nahibaluan niini ang serbisyo pinaagi sa ilang health center og dali gilayon niya kining gikuha tungod gusto niya nga matutokan usa ang iyang anak. "Para sa ako importante labi na karon sa panahon lisud, lisud mangita og trabaho ug lisud ang income. So, gipili nako nga mag family planning tungod dili ko gusto nga maagian sa akong anak, ang naagian pud namo nga kalisud. Mas maayo nga i-focus lang sa namo sa iya karon kung unsa ang naa sa amo karon, mao nang ga family planning ko,” sumala ni Chastine Moralde. Sa mga gusto mo avail sa libreng family planning services duol lang sa pinaka duol nga health centers. Daghan na nga mga kababayen-an ang na serbisyohan sa CHD katambayayong ang Department of Health - Caraga dinhi sa syudad kalabot na Family Planning.