BUTUAN CITY - Nagkatigum ang mga miyembro sa transport sector ug mga commuters sa natigayong National Day of Remembrance for road crash victims, survivors ug ilang mga pamilya kagahapon sa 3rd Floor, SM Event Center ning syudad. Sumala ni CTTMD Head Maria Kristina Cassion, kini ang pinakaunang higayon sa lokal nga panggamhan sa Butuan sa pagpanguna sa City Transportation and Traffic Management Department kun CTTMD nga nanguna sa kalihukan. “It’s a poignant reminder kung unsa ka mahinungdanon ang kinabuhi gyud no nga kinahanglan nato pangalagaan, ato gyud i-emphasize permi ang kining road safety. And this is one-way kani siya ingon ani nga activity nga aron ato gyung ma emphasize always and re-emphasize ang kamahinungdanon sa road safety,” pahayag ni Maria Kristina Cassion, CTTMD Head. Dugang pa niya, ang pag amping sa road safety dili lang pinaagi sa paningkamut sa gobyerno kundili lakip ang katawhan sa komunidad. Atol sa kalihukan, gi-emphasize sab ang dili maayong epekto sa mga road crashes sa surviving families lakip sab mga indibidwal nga naka survive sa unsa mang mga disgrasya. Sa mensaheng gipaabot ni Vice Mayor Lawrence Fortun pinaagi ni Konsehal Joseph Omar Andaya, angayan lamang sab nga dumdumon ang mga nahimu sa mga rescuers nga miresponde sa mga gakahitabong road crashes. “We too pay tribute to the dedicated emergency crews, police and medical professionals who deal daily with the traumatic aftermath of road crashes. Each victim has its road story of unfortunate days,” mensahe ni Vice Mayor Lawrence Fortun pinaagi ni Konsehal Joseph Omar Andaya. Pinaagi sa National Day of Remembrance, magsilbi kining panawagan aron hingusgan ang paningkamut nga mamenusan ang mga road casualties ug pagpatuman sa mga preventive measures. Dinhi sa Butuan, dili ikalimod nga daghan sab ang mga gakahitabong aksidente. Gihangyo karon ang kooperasyon sa publiko aron nga malikayan ang unsa mang mga aksidente sa dalan. Samtang, nagsindi og kandila ug naghalad og pag-ampo ang mga partisipante alang sa mga biktima sa road crashes lakip sa mga survivors ug tagsa ka pamilya.