Gidagsa sa mga aplikante ang natigayong Job Fair sa 3rd Floor SM City Butuan kagahapon. Usa si Mariel Banabatac nga taga Barangay Villakananga ang migahin og panahon sa pagpangaplay sa Job fair. Mapasalamaton kini dihang usa siya sa hired on the spot sa gi aplayan nga kumpanya isip frontliner. Sumala ni Mariel nga sa iyang iyaan siya nakahibalo nga dunay hiring ug sa walay pag duha-duha isip usa ka aplikante misanong siya sa nasangpit nga aktibidad. “Gipasa ni sa akong auntie nga naay job fair. So ako as a job seeker nag kara-kara ko og himo sa akong resume. Blessed kaayo, as in gikulbaan gyud ko sukad pa gaina pa nag mata gyud ko og sayo para ani,” pahayag ni Mariel Banabatac. Sa mensahe nga gihatag ni Konsehal Arturo Gado, Committee Chairperson sa Committee on Labor, Employment, and Human Resources, daku ang suporta sa Lokal nga Panggamhanan sa Butuan sa aktibidad nga mag hatag og trabaho sa katawhan sa Butuan. "This has always been Butuan's aspiration, to become the central hub, supporting regional growth by providing ample opportunities" sumala ni Konsehal Arturo Gado. Gibutyag sab ni Levey Navarro, Club President Rotary Club of Butuan District 3860 nga unang higayon nga gibuhat kining Job Fair ug nag plano pa kini og susamang aktibidad kauban ang City Employment Service Department para ma sustenar kini. Matud pa ni AG Joel Lobrino ug AG Ryan Jae Yap, nga ang pagbuhat ani nga inisyatibo usa sa area of focus sa rotary club, gitawag nila kining community development. Masaligon sila nga pinaagi sa pagpahigayon og Job Fair, makahatag og dugang oportunidad sa katawhan nga makapangita ug makabaton og trabaho. Mapasalamaton ang Lokal nga Panggamhanan sa Butuan sa pagpanguna ni City Mayor Ronnie Vicente Lagnada sa gibuhat sa Rotary Club of Butuan District 3860 tungod daku na kining tabang sa mga Butuanon. Ang Job Fair natigayon sa pagtambayayong sa lokal nga panggamhanan sa Butuan pinaagi sa City Employment Service Department, The Rotary Club of Butuan District 3860 ug Department of Labor and Employment.