Pormal nga gi-ablihan kagabie ang Micro, Small, and Medium Enterprises kun MSME Weekend Night Market sa Guingona Park ning syudad. Sa mensahe nga gipaabot ni Konsehal Joseph Omar Andaya, Chairperson sa Committee on Trade, Industry and Economic Development, mapasalamaton siya sa City Economic and Business Development Department kun CEBDD sa way puas nga suporta pinaagi sa pagpahigayon og managlahing kalihukan para sa mga MSME tungod dili ikalimod nga ang mga gagmayng negosyante dako og tabang sa ekonomiya sa Butuan lakip nga nakatabang sa ilang pamilya. Gipaabot sab ni Department of Trade and Industry Provincial Director Loriejane Sacote ang iyang kalipay sa LGU Butuan ug sa mga vendors kay tungod nagkahiusa kini. Hangyo lang niya nga dili kalimtan nga mahimong limpyo ang lugar aron mobalik gayud ang mga konsumante. Ang aktibidad subay sa selebrasyon sa MSME Week ug gihimo kini nga higayon sa CEBDD nga ma obserbahan ang angayan pa nga iimprove para sa planong night market sa syudad sa Butuan. Mamaligya sa mga produkto ang mga vendors matag Biyernes, Sabado ug Dominggo sa gabie.