Nahimong produktibo ang natigayong Modern Tricycle Roadshow sa South Atrium Robinsons Place Butuan kagahapon. Gipangunahan mismo ni CTTMD Head Maria Kristina Cassion ang pag abli sa aktibidad nga nagpasalamat sa tanang transport partners nga misanong sa kalihukan. “This program is driven by a shared vision nga hiniusa nga panglantaw sa usa ka sustainable and greener Butuan. Sa pila na ka dekada ang atong tricycle man gyod ang lifeblood sa atong dakbayan connecting people, communities and commerce. Ang tricycle serves as the first and last miles. Dako ang role sa atong tricycle sa whole transportation nga ecosystem,” tipik sa mensahe ni CTTMD Head Maria Kristina Cassion. Sa Key Note Address ni Mayor Ronnie Vicente Lagnada nga gibasa ni City Councilor Rey Desiata nagpasalamat sab kini sa tanan nga nagpakita og commitment sa programa. “Daghan ang higayon nga nag explore ta with the transport group unsa gyod ang maayo nga solusyon para mahatagan nato og episyente ug maayo nga panerbisyo ang atong katilingban ug atong mga commuter sa syudad. Our major game plan is to make Butuan a competitive, livable, sustainable and smart-eco city,” ang mensahe ni Mayor Ronnie Vicente Lagnada pinaagi ni City Councilor Rey Desiata. Gisiguro sa lokal nga panggamhanan sa Butuan nga makabaton sa kabag-uhan labi na sa transport system. “Here in Butuan the initiative called Transformation Modernization Program TMP dugay-dugay na sab nato ni nasugdan. Ang katuyuan dili pagwala sa inyong panginabuhian kundili ang pagpa improve sa inyong panginabuhian, pagpa improve sa paghatag og serbisyo sa atong katawhan. Nganung kinahanglan man ta mag modernize? Nganung ato paman ning utruhon nga okey naman ta ani? But the change of time mga igsuon nanginahanglan gyod, ni-evolve naman ang panahon.” Dugang mensahe ni Mayor Ronnie Vicente Lagnada pinaagi ni City Councilor Rey Desiata. Gipaningkamutan sa lokal nga panggamhanan sa Butuan ang daghang inobasyon sa transportasyon aron maprotektahan ang mga drivers ug commuters ug alang sa safety sa tanan. Ang usa ka Tricycle Driver nga si Nathaniel Cocon sa Barangay San Vicente andam mosuporta sa modernization program tungod alang kaniya mas nindot ang mga bag-ong unit sama sa badja nga dili maulanan sila nga mga driver ug labi na ang mga pasahero. “ Ang modernization iwas siya sa pollution ug safety napod ming mga driver ug ang mga commuter,” sumala ni Nathaniel Cocon, Tricycle Driver. Subay niini, gipresentar sa mga dealer ug manufacturer ang mga advantage sa mga gitanyag nga unit sa behikulo asa haum ug kwalipikado sa pagpatuman sa modernization program sa syudad. Samtang anaa usab ang mga personalidad nga gikan sa regional agencies aron mopasabot sa mga kooperatiba, operators ug drivers kabahin sa modern transportation isip kontributor sa pagkunhod sa global warming. Gipangunahan ang kalihukan sa lokal nga panggamhanan sa Butuan pinaagi sa City Transportation and Traffic Management Department.