Gipahigayon ang Mobile HIV testing sa pagpanguna sa Amoma Caraga Incorporated sa pakigtambayayong sa City Health Department sa lokal nga panggamhanan sa Butuan atol sa Caraga State University Hugyaw 2024, kagahapon. Ang Amoma Caraga Incorporated usa ka organisasyon nga nag promote og health awareness ug edukasyon sa mga kabataan lakip na sa mga People Living with HIV ug Tuberculosis. Ang kalihukan pinaagi sa STI HIV & AIDS Program sa City Health Department. Nikabat sa 105 ka indibidwal ang misanong sa libreng testing nga gitanyag. Gani, anaa ang presensya ni Dra. Olivia Dizon Bating, kasamtangan nga instructor sa College of Medicine ug Head sa Guidance Counselor sa tunghaan nga maoy nag dumala ug nagmonitor sa gipahigayong HIV Testing Services. Si Dra. Bating sab ang kanhing Infectious Diseases Specialist sa San Lazaro Hospital ug ang unang Filipino Physician nga nagpahigayon og ARVs sa mga pedia nga pasyente nga positibo sa HIV. Magpadayon nga makigtambayayong ang STI HIV & AIDS Program sa City Health Department sa mga ahensya ug opisina mapa pribado man o publiko aron sa paghanyag og libreng testing para sa tanan. Kini base sab sa mandato ni Butuan City Mayor Ronnie Vicente Lagnada.