Gipakusgan sa lokal nga panggamhanan sa Butuan pinaagi sa City Agriculture Office ang pag promote sa bio organic fertilizer sa mga vegetable farmers ning syudad aron makunhuran ang paggamit niini sa synthetic fertilizer nga nagkamahal na ang presyo sa merkado. Tungod niini gipailawom sa pagbansay ang nagkadaiyang Vegetable Farmers sa syudad kabahin sa Bio Organic Fertilizer Production sa pagpanguna sa lokal nga panggamhanan sa Butuan pinaagi sa City Agriculture Office katambayayong ang Caraga State University ug DA Caraga. Dinhi gitudlo ug gipakita ang mga paagi sa paggama sa nagkadaiyang klase sa bio organic fertilizer production aron tun-an ug iadopt sa mga mag-uuma. Plano karon sa duha ka mag-uuma ug entrepreneur nga sila Kenneth Morado sa Barangay Nongnong ug Joey Cassion sa Barangay MJ Santos nga iadopt ang bag-ong teknolohiya gamit ang nakat-unang bio organic fertilizer production aron makamenus sa gasto ug makatabang sa kinaiyahan ug mahilayo sa sakit ang mga konsumante sa gulay. “Kini nga training dako kaayo nga advantage sa amo nga mga farmers ug entrepreneur tungod kay una sa costing pa lang daan sa fertlizers didto nata makatipid kay kung mogamit kita og synthetic nga fertilizer sa giingon makadaot kini sa yuta. Samtang paggamit nato kining bio fertilizer naprepare na nato ang yuta daan with the micro-organism nga magamit nato sa pagpatubo sa atong mga tanum so dako kaayong advantage kini nga training,” pahayag ni Kenneth Morado, mag-uuma ug entrepreneur. Buot usab i-advocate ni Morado ang nakat-unan sa mga kaubanang mag-uuma sa Barangay Nongnong ilabina ang sama kanila nga usa upland farmer nga nagtanum og cabbage, atsal, raddish ug uban pang gulay. Gidasig sab niini ang ubang mag-uuma sa pag adopt ug motuon sa bag-ong inobasyon aron mas modako ang kitaon sa abot sa kaumahan. Samtang si Joey Cassion admitado nga naglisod sa mga bag-ong inobasyon apan naningkamot kini nga mapadayon ang pag-adopt sa bag-ong teknolohiya ilabina ang organic farming tungod isa kini sa makatabang nga magpabilin ang kahimsog sa yota nga iyang gitamnan. “Sa among napaminawan sa training maayo kaayo kay aron malikayan na ang paggamit sa synthetic kay una makadaot kini sa yuta ug mahal pa gayod paliton hinungdan akong paningkamutan ang pag-apply sa bio organic fertilizer kay aron makasave sab gamay ilabina kung ako mismo ang mohimo,” pahayag ni Joey Cassion, mag-uuma sa Barangay MJ Santos. Gipaningkamutan sa lokal nga panggamhanan sa Butuan pinaagi ni Mayor Ronnie Vicente Lagnada nga mapromote ang organikong paagi sa panguma ilabina sa gulay nga nag-unang pagkaon sa tawo aron mas luwas kining kaonon ug matabangan usab ang pag amping sa kinaiyahan.