Pormal nang gi turn-over sa DOH Center for Health Development - Caraga ngadto na sa DepEd Butuan City Schools Division ang mga supplies ug logistics nga magamit sa pito ka eskwelahan sa syudad nga napili para na sa Pilot Last Mile Elementary School. Gitunol ang mga nagkadaiyang supplies ug logistics sama sa Smart TV, Portable Mobile Trolley with Bluetooth, Speaker Wireless Lapel Microphone, Wireless Microphone, ug Multimedia Projector. Lakip usab gihatag ang mga sports supplies ug uban pang panginahanglanon para sa mga estudyante ug mga maestra. Ang mga eskwelahan nga makadawat mao ang Tagkiling Tribal Indigenous Elementary School, Datu Ecleo Elementary School, Datu Man-oloy Tribal Elementary School, Mahayag Elementary School, San Juan Elementary School, Tus-ol Elementary School, ug ang Masago Elementary School. Napili ang Butuan City nga usa sa implementing sites sa tibuok nasud sa Universal Health Care Healthy Learning Institution’s Pilot Last Mile Elementary Schools subay sa Republic Act 11223 o ang Universal Health Care (UHC) Act. Gikalipay ni Butuan City Mayor Ronnie Vicente Lagnada ang nadawat nga mga logistics ug supplies alang na sa mga lagyong eskwelahan sa syudad lakip na ang kanunay nga suporta sa DOH-Caraga sa Butuan City. Pinaagi niini mas makakat-on ang mga bata og dali ug mapadali ang pagtudlo sa mga maestra sa mga bata sa eskwelahan.