Gidagsa sa mga Senior Citizen gikan sa mga barangay sa syudad ang pagbansay sa Fall Prevention nga gipahigayon sa City hall lobby miaging semana. Pinaka unang higayon nga miapil ang 73 anyos nga si Damiana Duran sa kalihukan kung asa gibansay kanila ang mga sakto nga buhaton aron malikayan ang disgrasya sa ilang kaugalingon. “Maayo kaayo ni sa mga Senior Citizen sa Butuan City kay kani nga team sa mga Orthopedics naka hatag gayud ni og kaayuhan. Para gayud ni sa amo basta tumanon lang ang pahimangno sa amo,” pahayag ni Damiana Duran. Admitado ang mga doctor nga taas ang porsyento sa aksidente sa mga katigulangan hinungdan gipahigayon ang pagbansay sa Fall Prevention. Gitanyag kini sa Agusan Orthopedic Institute nga gilangkuban sa mga Doctors, Nurses, ug Physical Therapists sa Agusan. Timely ang aktibidad aron mahatagan og awareness ang mga senior citizen kung unsa ang mahitabo kanila kung sila ma aksidente. Gihatag sa mga katigulangan ang tambag sa insakto nga pamatasan sa paglakaw ug unsa ang mga ehersisyo nga tukma sa ilang gibati ug kakusgon aron malikayan nga ma fracture. Suportado sa Lokal nga Panggamhanan pinaagi sa Office for the Senior Citizen ang mga kalihukan hilabi na nga naglambigit kini sa mga senior citizen nga usa sa prayoridad sa mga programa ug serbisyo sa LGU-Butuan.