Hingpit nang nakabenipisyo ang mga residente ilabina ang mga mag-uuma sa Barangay Pianing sa syudad sa Butuan sa bag-ong nahuman nga farm-to-market road nga gipatuman sa City Engineers Office subay sa direktiba ni Mayor Ronnie Vicente Lagnada. Tungod niini, nagpasalamat si Bebeth Perer nga sementado na ang ubang bahin sa ilang kadalanan nga adlaw -adlaw’ng niyang ginabaktas aron maghatod sa iyang apo padulong sa tulunghaan. “Salamat kaayo ko kay dili na kaayo ko magkalapok kay nasemento naman diri nga grabe kalapok kaniadto medyo nakuhaan na ang lisod nga dalan diri sa among barangay. Hinaut unta nga mapadayon hangtud sa tumoy nga bahin. Daku na kaayo ning tabang kanamo ilabina sa mga mag-uuma kay dili na matumba ang sakyang motor labi na puno sa karga nga mga abot sa uma,” sumala ni Bebeth Perer. Ang nasangpit nga proyekto gipunduhan sa Local Government Support Fund LGSF-Barangay Development Program sa pag abag sa national government pinaagi sa DILG ilawom sa programang National Task Force-End Local Armed Conflict kun NTF-ELCAC. Gitinguha usab nga magpadayon ang pakig-abag sa city government sa Butuan ngadto sa national government aron paspas nga makaabot ang mga proyekto sa kabarangayan ug aron plastado na ang pagpakanaug sa mga agrikulturang produkto paingon sa merkado asa isa sa tidubdan nga pagpataas sa ekonomiya sa syudad sa Butuan.