Migradwar na ang kapin sa usa ka gatus nga Person Who Used Drugs kun PWUDs gikan sa nagkadaiyang barangay sa syudad, Marso 8. Kini human gipailawom sa katorse ka sessions sa Community-Based Drug Rehabilitation Program sa City Level Implementation 2nd Restorative Approach ilawom sa Drug Abuse Prevention ug Treatment Program sa City Anti-Drug Abuse Council. Apil usab nga migradwar ang 30 kapin nga kanhing PWUDs sa Skills Training on Electrical Wiring sa TESDA asa andam nang magamit ang mga natun-an sa pagpanarbaho. Gihangyo sa PDEA, PNP, CADAC ug lokal nga panggamhanan sa Butuan pinaagi sa City DILG nga himuong motibasyon ug inspirasyon ang pamilya alang sa kabag-uhan aron hingpit nang malayo o dili na mobalik sa pagamit sa ginadiling droga. Gi-engganyo usab ang ubang PWUDs nga mo-enrol sa TESDA aron mabansay sa nagkalain laing programa nga gitanyag asa daku ang posibilidad nga magamit panahong mangita kini og trabaho alang sa panginabuhian sa pamilya. Gipanghinaut sa lokal nga panggamhanan sa Butuan sa pagpanguna ni Mayor Ronnie Vicente Lagnada nga pinaagi sa mga natun-an nila sa training dili na sila mobalik pa sa bisyo ug hatagan og prayoridad ang kaugmaon sa pamilya.