Gidasig ug gihatagan og gahum ni Vice Mayor Lawrence Fortun ang mga Punong Barangay sa syudad sa Butuan pinaagi sa pagpailawom sa pagbansay kabahin sa Gender ug Development Plans ug Financial Statements sa matag barangay. Ang pagbansay gihimo alang sa inklusibo ug pagpakusog sa engagement sa kabarangayan nga dunay kalambigitan sa gender equality ug tranparensiya sa pinansyal ingon man ang pagbaton sa capacity building initiatives aron makamugna og bag-ong inisyatibo ug plano nga dunay positibong resulta alang sa kaayuhan ug pagpalambo sa komunidad. Gihangyo sab ni Vice Mayor Fortun ang tanan sa pagsumite na sa plano ug project proposal alang sa tuig 2024 sa dili pa mahuman ang kasamtangang tuig aron dunay igong oras ug panahon ang komitiba sa appropriation ug accounts sa pag review niini. Malampusong natigayon ang aktibidad pinaagi sa pagbahin ka tulo sa mga partisipante nga gilangkuban sa Punong Barangay, Barangay Treasurer ug GAD Focal Person sa 86 barangays sa syudad sa Butuan. Kini aron makasigurong masabtan ang diskusyon sa pagpanguna ni Vice Mayor Fortun, Committee Chairperson sa Appropriation ug Accounts uban sa mga konsehales nga myembro sa komitiba ug pipila sa mga concern offices.