Opisyal nang gi-ablihan sa publiko ang Buy Caraga By Caraga Balangay Edition Trade Fair sa Ground Floor SM Butuan kagahapon. Napuno sa nindot nga kolor ang mga crafts gikan sa mga Micro, small and medium enterprises kun MSME's ug gipasundayag sab nila ang lamian nga mga delicacies gikan sa lima ka probinsya sa Caraga. Mokabat sa 240 ka mga small entrepreneur ang nipartisipar sa gihimong trade fair. Sa mensahe nga gipaabot ni Mayor Ronnie Vicente Lagnada nga representahan ni Konsehal Joseph Omar Andaya, daku ang papel sa mga MSME's sa pagpalambo sa usa ka syudad tungod nakahatag kini og trabaho ug panginabuhian sa mga tawo. Samtang gipasundayag sab ang mga produkto pinaagi sa usa ka Product Fashion Parade asa gisout sa mga models ang gama sa mga MSME's ug bitbit ang mga delicacies. Daku ang pasalamat sa Department of Trade and Industry Caraga sa pag suporta sa kalihukan ug nanghinaut nga suportahan sa katawhan ang mga MSME's para matabangan sila nga mas mapalambo pa ilang panginabuhian. Ang aktibidad kabahin sa kasaulugan sa Balangay Festival sa Butuan City. Molungtad ang Buy Caraga By Caraga Balangay Edition Trade Fair hangtud Mayo 21 ning tuig.