Nagkatigum ang mga Punong Barangay sa nagkadaiyang barangay ning syudad sa Butuan alang sa Unang Liga Meeting ning tuig 2024 nga gipangunahan ni Liga ng mga Barangay President Gemma Tabada miaging semana. Nanguna sa hisgutanan sa meeting ang mga plano ug proyekto nga nakahan-ay alang sa mga barangay sa tuig 2024 ug ang pagtubag sa pipila ka issues ug concern sa mga barangay. Kauban sab sa meeting si Forester Jess Ivan Saburao, Officer Incharge sa City Environment and Natural Resources Department aron mahisgutan ang solusyon mahitungod sa malata nga basura. Anaa sab sa meeting si City DILG Director Charissa Guerta aron ipahinumdum ug giyahan ang mga Punong Barangay sa mga dokumento nga kinahanglang isumite na sa buhatan pinasikad sa mga gipatumang programa ug proyekto sa tagsang mga barangay. Ang liga meeting ipahigayon matag bulan nga gisuportahan ni Mayor Ronnie Vicente Lagnada aron personal masayran ug madungog ang mga issues ug concern nga giatubang sa matag barangay sa ingon mahatagan gilayun kini sa kasulbaran uban sa tabang sa pipila ka buhatan sa lokal nga panggamhanan sa Butuan.