Mibisita ang mga personahe sa Department of Tourism Caraga kang Butuan City Vice Mayor Lawrence Fortun miaging semana. Kini sa pagpanguna ni DOT Regional Director Ivonne Dumadag aron hisgutan ang ipahigayong paglusad sa Philippine Experience Program kun PEP: Culture, Heritage and Arts Caravan sa Caraga Region karong umaabot Oktubre 28-30 tuig 2024 asa makita ang nagkalain-laing pasundayag sa rich cultural heritage sa Butuan City ug Caraga Region. Subay niini, nagpahigayon sab og site validation ang mga personahe sa DOT Caraga sa mga partner LGU isip pagpangandam sa aktibidad. Ang programa gidisenyo aron mapromote ang turismo sa Caraga region pinaagi sa malungtaron, lig-on ug inklusibo nga pamaagi. Ang aktibidad usa sa paagi sa paghatag og patas nga oportunidad sa tourism development lakip usab ang pagpaambit sa mga benepisyo sa turismo sa mga wala pa nailang maanindot nga destinasyon. Malipayong gi-abi-abi ni Vice Mayor Fortun ang mga bisita ug mapasalamaton kini nga usa ang dakbayan sa Butuan nga nahilakip sa programa. Dugang pa ni Vice Mayor Fortun, adunahan ang Butuan sa Cultural Heritage Site. Gani, gihinganlan kini nga Home of the Balangays tungod sa mga nakita o nakubkob nga mga parte sa Balangay Boat nga gituohang gigamit pa niadtong 320 AD.