Mi courtesy call kagahapong adlawa ang deysi otso ka mga partisipante sa Ginang Butuan 2023 sa City Mayor’s Office ug Sangguniang Panlungsod sa Butuan. Mipaabot og suporta si City Assistant Administrator Roy Serdeña sa mga partisipante. Kalipay sa syudad sa Butuan ang kalihukan tungod naghatag kini og higayon sa mga inahan nga ipakita ang ilang talento ug pakusgan ang ilang adbokasiya para sa mga kababaihan. Sa ilang pagbisita usab sa Sangguniang Panlungsod sa pagpanguna ni Vice Mayor Lawrence Fortun, gipaabot sa mga partisipante ang ilang kalipay sa gihatag nga suporta sa mga kababaihan sa syudad hilabina sa pag mugna og mga ordinansa ug resolution nga naglambigit sa pagpa uswag sa kinatibuk-ang kaayuhan sa mga kababaihan sa syudad. Hugtanong gitutokan sa Lokal nga Panggamhanan sa pagpanguna ni Mayor Ronnie Vicente Lagnada ang paghatag sa igong suporta sa mga kababaihan sa syudad sa Butuan. Ang kalihukan agig pagsaulog sa mga National Women’s Month Celebration. Ang Ginang Butuan 2023 ipahigayon Marso 29, adlawng Myerkules sa Robinson’s Place Butuan sa ala una sa hapon.