Sunod-sunod ang pagpahigayon og Committee Hearing sa mga miyembro sa Sangguniang Panlungsod sa dakbayan sa Butuan sa pagpanguna ni Butuan City Vice Mayor Lawrence Fortun. Kini aron personal madungog ug madiskusyunan ang mga nagkalain-laing programa nga ipatuman sa dakbayan sa Butuan. Nag-una sa gihisgutan ang Komitiba sa Traffic Management sa ipahigayong road closure sa pipila ka mga kadalanan sa syudad ug ang umaabot nga aktibidad sa Panaad 2024. Ikaduha ang Committee Hearing kalabot sa Komitiba sa Education, Culture, Arts ug Heritage asa mao ang paghisgut sa Butuanon Iskolar and Educational Assistance Program asa subay sa giduso nga ordinansa sa pagmugna og Medical Scholarship and Return Service Program sa syudad sa Butuan. Ikatulo ang Komitiba sa Appropriation ug Accounts nga nakatutok ang hisgutanan sa Annual Budget sa mga barangay ug sangguniang kabataan. Ikaupat ang Komitiba sa Franchise and Licenses kalabot sa mga aplikasyon sa renewal sa prangkisa sa tricycle-for-hire ug ang pagpaminaw sa mga sentimyento sa mga drivers ug operators kabahin sa modernization program ug ang ikalima ang pagpahigayon sa panagtigum sa Komitiba sa Lot Awards aron mahatagan og katin-awan ang gipaabot nga mga problema kalabot sa housing projects ug pagpaminaw sa pipila ka reklamo kabahin sa demolition activities. Gipaningkamutan sa SP members nga makapahigayon sa committee hearings aron masabtan ug mahatagan sa katin-awan ang mga hingtungdan tungod ang mga balaod nga gihimo sa lehislatibo naglantaw sa kaayuhan sa kinatibuk-ang dakbayan sa Butuan.