Andam na ang lokal nga panggamhanan sa Butuan sa kasaulogan sa Balangay Festival 2024. Sa Teleradyo miaging Biyernes, gibutyag ni Public Information Division Officer in Charge Michiko De Jesus nga dunay mga major events nga milangkob sa Balangay Festival 2024. Kini ang Grand Opening sa May 13, Mutya hong Butuan 2024 sa May 17 ug selebrasyon sa kapiyestahan sa syudad sa May 19 nga ipahigayon sa Festival Center Sports Complex Duna sab display ug mapalit nga mga lain-laing local products nga food ug non-food items nga magsugod karong May 3 sa alas sais sa gabie. Makita sab sa River Park ang balangay boat nga mao Ang Raya Kulambu, nga nakalawig na sa Tsina. Sugod May 4 hangtud May 12 adunay Festival of Talents sa nagkalain-laing mga estudyante ug mga pasundayag sa mga local bands sa River Park. Duna sab Culinary Festival, Bugsay Balangay ang pinaka una nga dragon boat competition sa dakbayan, Battle of the Bands, Balik Butuan, Balangay festival Mayor’s Cup Shoot, Barangay Basketball Liga Finals ug invitational game nga salmutan sa UP Fighting Maroons ug University of San Carlos Warriors Seniors Team sa FSUU gym ug uban pang kalihukan. Ipahigayon sab Ang Garbo Art Exhibit ugma sa Robinsons Mall. Subay sa selebrasyon sa Balangay Festival 2024 nakatakda sab nga ipahigayon ang Butuanon Wheels sa Barangay Bonbon sa Mayo 11. Sa May 25 ang Butuan Football Festival sa Barangay Tiniwisan Poly Sports nga salmutan sa lain-laing teams gikan sa managlahing dapit sa nasud. Sa May 18 dunay ipahigayon nga City Wide Pahina o ang panaghiusa sa mga residente, students, business owners sa pagpanghinlo sa palibot ug sa May 24 ipahigayon sab ang Mass Civil Wedding sa mga kaigsoonang IPs nga pangunahan mismo ni Mayor Ronnie Vicente Lagnada ang seremonya. Gipaniguro sab sa lokal nga panggamhanan sa Butuan ang seguridad sa tanan pinaagi sa pagtinabangay sa PNP, AFP, Civil Security Unit, Maritime ug Coast Guard lakip sab sa dagan sa trapiko pinaagi sa City Transportation Traffic Management Department. Ang Balangay simbolo sa identity nga nahimong resilient ang mga Butuanon pinaagi sa pagbalik sa Butuanong kultura ug abunda nga heritage. Giimbitahan ang tanan sa mga lain-laing pasundayag pinaagi sa mga events nga giandam sa lokal nga panggamhanan sa Butuan apil na ang daghan pang sorpresa sa selebrasyon sa 38th Balangay Festival 2024.