Daku ang mamahinung partisipasyon sa mga barangay sa syudad sa Butuan sa mga kalihukan sa Adlaw Hong Butuan. Kini ang nahisgutan atol sa natigayong Liga Meeting sa Grand Palace Hotel sa pagpanguna ni Liga ng mga Barangay President Gemma Tabada nga aktibong gisalmutan sa mga kaubang punong barangay. Usa sa nahisgutan ang ipahigayong Tabo Hong Barangay asa gikinahanglan ang partisipasyon ug kooperasyon sa matag barangay. Sa nasangpit nga panagtigum anaa sab ang presensya sa mga personahe gikan sa COMELEC alang sa pagtubag sa lain-laing issues ug concern nga buot ipaabot sa mga punong barangay. Anaa sab ang DILG alang sa pagpasabot sa mga barangay kabahin sa paglusad sa Buhay Ingatan, Droga Ayawan o BIDA Activity asa dunay dakung kalambigitan ang tanan ug ang paghisgut ug diskusyon kabahin sa giduso nga ordinansa sa barangay asa mao ang pagpatuman sa Uniformity sa Barangay Clearance Fee collection policy ug ang presentasyon sa Registry of Barangay Inhabitants and Migrants kun RBIM. Ang Liga Meeting usa sa binulan nga aktibidad aron mahatagan og higayon ang tanang punong barangay sa pagpadungog ug pagpaabot sa mga buhatan sa city government sa Butuan sa nag-unang issues ug concerns sa tagsa-tagsang barangay. Sa kinabuk-an, nahimong hapsay ang dagan sa kalihukan ug nagpasalamat si Liga ng mga Barangay President Tabada sa kooperasyon sa tanang punong barangay asa nagtinguha sa kaayuhan sa matag barangay ug mga residente.