Gitagbo sa mga miyembro sa Sangguniang Panlungsod sa pagpanguna ni Butuan City Vice Mayor Lawrence Fortun ang mga kadagkuan sa National Grid Corporation of the Philippines kun NGCP ug Agusan del Norte Electric Corporation kun ANECO atol sa 13th sp session, miaging semana. Kini aron hisgutan ang operations ug local subline system niini sa ingon maresolba na ang sunod-sunod nga nasinating power interruption sa halos tibook syudad sa Butuan nga nagsugod pipila na ka semana. Sa nasangpit nga SP session gihatagan sa kahigayunan nga mupasabot ang NGCP ug ANECO sa mga rason sa power interruption asa daghan na sa mga stakeholders ang apektado. Nasuta nga sagad sa rason sa power interruption mao ang technical issues o defective lines, natural phenomena ug wildlife interference nga dili makontrolar ug mga aktibidad sa tawo nga nakaapekto sa electric infrastructure. Usa sab sa rason ang kakulangon sa komunikasyon tali na sa ANECO ug NGCP. Hinungdan gihangyo sa tibook sangguniang panlungsod ang pagtinabangay sa duha ka ahensya aron masulbad na ang problema. Tungod niini, mipasalig ang duha ka partido nga paningkamutan ug magtinabangay sa pagsulbad sa problema sa halos tibook syudad sa Butuan.