Garbo karon sa Barangay Tiniwisan ning syudad nga sila kapin lima na ka tuig nga malnourished-free barangay. Nahimong dakong tabang ang programang Food Always in The Home kon FAITH Garden aron sa pag tabang sa mga bata nga dunay gamay nga timbang sa nasangpit nga barangay. Ang FAITH Garden usa ka programang nag awhag sa mga residente sa matag barangay nga mag tanum og gulay sa ilang nagkadaiyang tugkaran. Kasagaran sa mga tanum sa FAITH Garden mao ang malunggay, alugbate, papaya, petchay, kalabasa, talong, pipino, ug uban pang klaseng gulay nga maluto dayon sa mga residente. Usa ang 40 anyos nga si Lory Delos Reyes ang dunay household gardening sa ilang panimalay. Tuig 2013 siya nag sugod sa iyang gardening nga nahimo napud niya nga panginabuhian ug kuhaanan sa ilang pagkaon. “Ako lang nag hunahuna ko mag garden para sa akong mga anak, para maka mao sila og kaon sa gulay. Grabe ka importante gyud kay kong walang-wala gyud kay kwarta mao ra gyud ang among isud-an.” Sumala sa Lory Delos Reyes. Makita nga hugtanon ang suporta nga gihatag sa konseho sa barangay sa pagpanguna ni Punong Barangay Alma Tagalog. Kanunay niyang gidasig ang mga residente sa pagtanum sa kaugalingong gulay ug prutas sa ilang tugkaran. Tungod sab sa nasangpit nga programa daghan na nga pasidungog ang nakuha sa barangay. Sama na lamang sa Malnourished-Free Barangay tungod sa ilang Adopt a Child Program nga dakong tabang sa mga batang kulang sa timbang. Pinaagi sa Adopt a Child Program adunay gina sponsor nga bata ang kada miyembro sa konseho ug pakan-on og masustansiya nga pagkaon ang bata. Miuban sa pagbisita sa mga FAITH Garden ang mga personahe sa City Health Department - Nutrition Unit. Ang CHD-Nutrition Unit kanunay ug padayon nga nag monitor sa mga FAITH Garden sa matag barangay. Atol sa pag bisita sa mga FAITH Garden sa barangay, nagpahigayon sab sila tree planting sa mga fruit bearing trees sama sa lansones ug rambutan.