Daghan ang mi-apil sa Dongon-late restoration planting activity nga gipahigayon sa Wetland Center Barangay Pagatpatan ning syudad, adlawng Biyernes. Dungan nga nagtanum og 100 dongon tree ug 300 pagatpat tree ang mga personahe sa PNP, BFP, BJMP, AFP, AIRFORCE, Barangay Officials ug LGU Butuan employees kauban sila Butuan City Vice Mayor Lawrence Fortun ug City Councilor Rey Desiata. Mapasalamaton si Vice Mayor Fortun sa mga mi-apiol sa tree planting activity ug nanghinaut nga modako pa kini nga kalihukan sa umaabot nga katuigan ug maapil na ang mga estudyante aron masayran niini ang kamahinungdanon sa dongon tree sa balangay festival. “Maybe next year apil na ang mga bata sa pagtanom apil ang pag orient sa ila unsa ang dongon ug unsa ang iyang importance sa ato nga mga Butuanon. Unsa ang value niya nganung apil siya sa Balangay Festival tungod ang balangay is made of dongon that’s a very important part of our history, our culture even our identity as Butuanon,” sumala ni VM Lawrence Fortun. Paningkamutan sa City Environment and Natural Resources Department CENRD nga maatiman ang mga bag-ong tanum nga kahoy aron mabalik ang kanindot sa dapit isip usa sa cultural heritage sites sa syudad ug isip coastal protection tungod usa kini sa makapugong sa mga balod, bagyo ug maka stabilize sa shorelines. Mamahimo sab kining habitat sa nagkalain-laing marine species ingon man makabalik kini sa ekonomiya gumikan sa lig-on niini nga kahoy nga magamit sa pag gama og furniture, shipbuilding ug uban pa. Ang Dongon-Late restoration planting activity gipangunahan sa City Environment and Natural Resources Department CENRD.