Gipangunahan ni Mayor Ronnie Vicente Lagnada ang natigayong Butuan City Development Council 1st semester 2024 Full Council Meeting kagahapon sa VCDU Prince Hotel Barangay Imadejas syudad sa Butuan. Dinhi gilatag ni Mayor Lagnada ang mga long term plan ug big ticket projects alang sa padayong pag-uswag sa dakbayan sa Butuan padulong sa pagpataas sa ekonomiya. Kini gilangkuban sa Butuan International Logistical Seaport ug logistical highway, Agro-Industrial Business Center, Butuan South District Complex asa anaa dinhi ang Command Center, Butuan City Police Station ug Butuan City Fire Station, River Park and Marina Development, Upgraded Butuan Medical Center into Level III Hospital, Clean Water Facility, Butuan City Energy Development Plan hangtud tuig 2050, Butuan City of Excellence sa North, East ug West, Butuan City ICT, DOP City Government Center ug uban pa. Gihingusgan ni Mayor Lagnada nga mapadayon ang konstruksyon ug mapatuman ang nasangpit nga mga proyekto padulong sa mas progresibong syudad ug maayong kaugmaon sa mosunod nga henerasyon. Samtang gipakita sab niini ang financial performance sa city government sa Butuan gikan sa tuig 2016 hangtud tuig 2023 asa dunay dakung kausaban nga kaya nang makasuporta sa dagkong infrastructure projects. Daku sab ang pagsalig ug panlantaw ni Mayor Lagnada nga mas motaas pa ang pamunduhan sa syudad gikan tuig sa 2024 hangtud tuig 2034 gumikan sa panaghiusa ug pagtinabangay sa tanan aron mapatuman ang maluntaron ug lig-on nga programa. Gipahayag sab ni Mayor Lagnada ang itukod nga Mindanao Disaster Resource Center dinhi sa syudad nga dunay gibana-banang kantidad nga 2 billion pesos asa ipatuman sa Department of Social Welfare and Development alang sa mas paspas na nga relief operations sa mga maigo o maapektuhan sa kalamidad sa rehiyon. Suportado si Mayor Lagnada sa mga miyembro sa Sangguniang Panlungsod, Punong Barangay, Civil Society Organizations ug tibook pwersa sa LGU Butuan. Ang aktibidad gipangunahan sa City Planning Development Department isip secretariat sa BCDC.